RBS na IBUKA basuye Abana b’imfubyi zibana mu Karere ka Ruhango
Tariki ya 18 Mata 2012, abayobozi n’abakozi b’Ikigo cy’Igihugu Gitsura Ubuziranenge (RBS) bari kumwe n’Umuyobozi w’Akarere ka Ruhango ndetse n’abayobozi bakuru b’Umuryango uharanira Inyungu z’Abacitse ku icumu rya Jenoside yakorewe Abatutsi mu Rwanda (IBUKA) basuye abana b’imfubyi za Jenoside batuye mu Karere ka Ruhango.
Iki gikorwa cyabaye mu rwego rwo gukomeza kwihanganisha, gufata mu mugongo no gushyigikira abarokotse Jenoside yakorewe Abatutsi mu 1994 muri rusange, hasurwa by’umwihariko imfubyi za Jenoside zirera zibumbiye muri AOCM (Association des Orphélins Chefs de Ménages). Iki gikorwa cyitabiriwe n’Umuyobozi w’Akarere ka Ruhango Bwana François Xavier Mbabazi, abayobozi n’abakozi ba RBS barangajwe imbere n’umuyobozi Mukuru, Dr. Mark Cyubahiro Bagabe ; n’Umuyobozi Mukuru wa IBUKA Bwana Jean Pierre Dusingizemungu hamwe n’Umunyamabanga Nshingwabikorwa wa IBUKA Bwana Janvier Forongo.
Icyari kigamijwe kwari ugusura no gufata mu mugongo abana b’imfubyi za Jenoside bibumbiye muri AOCM no gusura umushinga w’ubudozi baterwamo inkunga n’abakozi ba RBS. Hasuwe amamashini n’ibikoresho by’ubudozi RBS yaguriye AOCM Ruhango, ndetse hanasurwa indi mishinga yo kuboha imipira yo kwambara n’uw’ubworozi bw’inkoko AOCM yatewemo inkunga n’abandi baterankunga batandukanye.
Nyuma yo gusura ibikorwa bya AOCM, Umuyobozi Mukuru wa RBS yatangaje ko kuva muri Mata 2011, RBS yiyemeje gukorana n’abana b’imfubyi za Jenoside bibumbiye muri AOCM Ruhango mu rwego rwo gukomeza kubababa hafi no gushimangira ikizere cyo kubaho. Yongeyeho ko hatekerejwe ku mushinga wafasha AOCM gutera imbere aho kuba bahabwa imfashanyo ihita irangira ntigire icyo isigira abayigenewe. Ni muri urwo rwego RBS yafungurije abo bana konti ishyirwaho imfashanyo igenewe uyu mushinga w’ubudozi, hagurwa amamashini adoda ndetse konti isigara ho n’andi mafaranga arenga miliyoni imwe n’ibihumbi magana arindwi (Rwf 1,700,000) azakomeza kongerwa no gukoreshwa mu guteza imbere umushinga. Umuyobozi Mukuru wa RBS yijeje abanyamuryango ba AOCM Ruhango ko RBS izakomeza kubaba hafi igakurikirana kandi igatanga ubujyanama mu bijyanye n’imicungire y’imishinga bafite kugira ngo bashobore kwiteza imbere kandi bakore ibicuruzwa byiza bishobora guhangana ku masoko yo mu Rwanda no hanze yayo. Yabashishikarije gutsinda amateka mabi babayemo bakigirira icyizere n’inzozi nziza bityo AOCM ikazava ku kuba Association ikagera ku rwego rwa koperative ndetse no ku rwego rwa sosiyete ikomeye y’ubucuruzi.
Mu ijambo rye, Umuyobozi w’akarere ka Ruhango yashimiye RBS na IBUKA baterekereje ku bana birera b’imfubyi za Jenoside yakorewe Abatutsi, yizeza abanyamuryango ba AOCM ko Akarere ka Ruhango kazakomeza kubaba hafi kabafasha gukemura bimwe mu bibazo bibangamira iterambere ryabo kandi bazakomeza kubagira inama muri byose.
Umuyobozi wa IBUKA mu ijambo rye yashimiye RBS kubw’igikorwa cyiza cyane kidakunda gutekerezwa na benshi cyo gutekereza ubufasha bagenera Abacitse ku icumu bwabagirira umumaro mu buryo burambye aho kubaha imfashanyo itaramba. Yasobanuye ko ubu buryo bwakoreshejwe na RBS bukwiye kwigirwaho n’abandi bagiraneza bose bifuza gutera inkunga abarokotse Jenoside yakorewe Abatutsi bityo bakabafasha kwiteza imbere mu buryo burambye. Yakomeje asaba abanyamuryango ba AOCM gukomera bagakomeza kuba intwari, bakarangwa n’uburere n’ubupfura birinda ibishuko n’imyitwarire mibi, bakongera ubumenyi n’ubushobozi biga kandi banitabira ibindi bikorwa by’imyuga iciriritse kugira ngo babashe kubaho ndetse banateze imbere abana b’imfubyi bagenzi babo bashinzwe kurera.
